У літаратурна-музычнай гасцёўні «Сустрэчы» раённай бібліятэкі сабраліся таленты і прыхільнікі, паэты і аматары паэзіі. У Смаргонь завіталі госці з абласнога цэнтра – старшыня Гродзенскага аддзялення Саюза пісьменнікаў Беларусі Людміла Кебіч, намеснік старшыні Дзмітрый Радзівончык, паэтка, член Саюза пісьменнікаў Беларусі Кацярына Каламійцава і паэтка, член Гродзенскага гарадскога літаб’яднання «Надзея» Таццяна Лугавая.
«Паэтычная сімфонія». Вечарына натхнення і музыкі адбылася ў Смаргонскай раённай бібліятэцы
Культура
28.03.2025
Вядучыя напачатку выказалі спадзяванне, што імпрэза мае быць сапраўднай паэтычнай сімфоніяй, дзе кожнае слова і кожная нота будуць гучаць ва ўнісон, ствараючы атмасферу творчага натхнення.
Цёпла, душэўна стала ў зале. Зазвінелі галасы сучаснай паэзіі. Да гродзенскіх творцаў далучыліся мясцовыя: Вольга Андрушчанка, Ірына Гаева, Мікалай Цітавец.
Галоўны акцэнт падчас імпрэзы быў зроблены на кнігу «Памяти вечный огонь». «Сёння мы прэзентуем калектыўны зборнік літаратурна-мастацкіх твораў аўтараў Гродзеншчыны, які выпусцілі да 80-годдзя вызвалення Беларусі ад нямецка-фашысцкіх захопнікаў, ён называецца «Памяти вечный огонь». У выданні прадстаўлены творы 56 аўтараў. Не толькі вершы, але і проза (эсэ, успаміны, нарысы) пра Вялікую Айчынную вайну, пра Вялікую Перамогу, пра вызваленне беларускіх зямель ад нямецка-фашысцкіх захопнікаў і ўспаміны родных і блізкіх людзей, пра ўдзельнікаў тых памятных падзей. У зборніку ёсць і творы смаргонцаў: вершы Вольгі Андрушчанкі і Ірыны Гаевай, а таксама эсэ Валянціны Богуш і Дзмітрыя Главінскага, – адзначыла Людміла Кебіч. – Адметнасць творчага праекта ў тым, што гэта вынік сумеснай працы членаў Саюза пісьменнікаў Беларусі, а таксама аматараў літаратуры і аўтараў-пачаткоўцаў».
Да прадстаўленага выдання ёсць вялікая чытацкая зацікаўленасць. Гэты зборнік стваральнікі і аўтары шмат прэзентуюць, не толькі ў Гродне, але і ў райцэнтрах вобласці. Ва ўстановах адукацыі і бібліятэках. Прайшла прэзентацыя кнігі «Памяти вечный огонь» і на XXХII Мінскай міжнароднай кніжнай выставе-кірмашы. І смаргонская публіка слухала выступоўцаў, затаіўшы дыханне.
Сустрэча выразна паказала, што паэзія жывая і прадаўжае аб’ядноўваць людзей розных пакаленняў. У эпоху кароткіх мабільных паведамленняў вершы застаюцца астраўкамі глыбіні і шчырасці. Апынуўшыся ў чароўным свеце слоў і вобразаў, а таксама песень, якія выканала народная вакальнай група «Кантабіле», слухачы сапраўды адчулі паэтычную сімфонію, якая так акрыляе і дорыць надзею на лепшае.
Гродзенскія пісьменнікі перадалі ў дар кнігі, якія былі выдадзены за апошнія гады па ініцыятыве Гродзенскага аддзялення Саюза пісьменнікаў Беларусі. Усе жадаючыя мелі магчымасць набыць новы зборнік «Памяти вечный огонь» і атрымаць аўтографы ад аўтараў, творы якіх увайшлі ў выданне.
Пасля мерапрыемства члены Гродзенскага аддзялення Саюза пісьменнікаў Беларусі накіраваліся ў Солы, на могілкі, дзе пахаваны вядомы беларускі пісьменнік Мар’ян Дукса, і ўсклалі кветкі на магіле творцы.
Галіна АНТОНАВА
Фота аўтара
