У КСУП “Агра-Солы” Смаргонскага раёна прайшоў семінар па вырошчванні гібрыдаў кукурузы

Экономика
13.09.2018 16:45
386
13 верасня ў КСУП “Агра-Солы” на полі за аграгарадком прайшоў семінар па вырошчванні кукурузы. У ім удзельнічалі прадстаўнікі ўпраўленняў сельскай гаспадаркі і харчавання, галоўныя аграномы  Ашмянскага, Астравецкага і Смаргонскага раёнаў, спецыялісты сольскай агранамічнай службы, прадстаўнікі фірмаў “Сангента” і “Салвэй Лімітэд”, якія займаюцца селекцыйнай работай, стварэннем, апрабаваннем і продажам розных гібрыдаў кукурузы.

З уступным словам перад прысутнымі выступіла дырэктар КСУП “Агра-Солы” Вольга Лук’яненка. Яна адзначыла, што пры надойванні ў гаспадарцы каля 7 тысяч літраў малака на адну карову трэба пастаянна думаць аб добрай кармавой базе. І хаця ўвага надаецца вырошчванню люцэрны, травяных кармоў, асноўнай культурай па-ранейшаму застаецца ўсё ж кукуруза.

У гаспадарцы вырошчваюць больш за 15 гібрыдаў гэтай культуры французскай, украінскай і беларускай селекцыі. Кукуруза была пасеяна вясною на плошчы 1200 гектараў. На ўсіх палях праводзіліся доследы па кожнаму гібрыду. “ І трэба адзначыць, што вынікі атрымаліся нядрэнныя, паколькі гэты год – кукурузны, - сказала Вольга Іванаўна. - Але асаблівы, і розныя гібрыды кукурузы паводзілі сябе па-рознаму. Некаторыя з іх  паспелі раней тэрміну, але цяпер амаль усе, ад ранніх да позніх гібрыдаў кукурузы, якія знаходзяцца на палях, практычна гатовы да ўборкі”.

IMG_6204.jpg

Перад удзельнікамі семінара выступае з уступным словам дырэктар КСУП “Агра-Солы” Вольга ЛУК’ЯНЕНКА.


Вольга Лук’яненка звярнула ўвагу прысутных на тое, што пры вырошчванні кукурузы павінна строга выконвацца тэхналогія, уносіцца ў поўным аб’ёме неабходныя мінеральныя ўгнаенні, добра апрацоўвацца глеба, выкарыстоўвацца спецыяльныя сеялкі дакладнага высеву. І хаця ў КСУП “Агра-Солы” няўхільна выконваюць тэхналогію вырошчвання кукурузы, але сёлета былі заўважаны іншыя праблемы: гэту культуру не абмінулі шкоднікі і хваробы.  Прычым, як ні дзіўна, розныя гнілі нядрэнна развіва-юцца на лёгкіх глебах нават у засушлівых умовах.

IMG_6210.jpg

Удзельнікі семінара на кукурузным полі.

IMG_6213.jpg

Аб кукурузе расказвае прадстаўнік фірмы “Сінгента”.

IMG_6229.jpg

Прадстаўніца “Салвэй Лімітэд” звяртае ўвагу прысутных на гібрыды кукурузы, насенне якой пастаўляе гэта фірма.

IMG_6219.jpg

Удзельнікі семінара аглядаюць кукурузу.

IMG_6288.jpg

Дырэктар КСУП “Агра-Солы” Вольга Лук’яненка з кукурузнымі пачаткамі.


На думку кіраўніка гаспадаркі, нягледзячы на сёлетняе спякотнае лета з рэдкімі дажджамі, пры добрай агратэхніцы ўраджайнасць будзе каля 500 ц/га. Кукуруза вырасла лепшая, чым у мінулыя гады. Але па вазе лягчэйшая, бо адбылося падсыханне ніжніх лісцяў, што паўплывае на якасць корму. А вось зерне апраўдала надзеі спецыялістаў агранамічнай службы. Яго таксама неабходна выкарыстоўваць у рацыёне дойнага статку для атрымання прыбаўкі малака, паколькі ў зерні захоўваецца больш пажыўных рэчываў. Аднак калі яно не раздроблена, то карысці ад яго выкарыстання мала. Таму вялікае значэнне мае тэхналогія ўборкі кукурузы.

У КСУП “Агра-Солы” на кормаўборачных камбайнах памянялі ўсе барабаны для здрабнення кукурузнага зерня. На ўборцы гэтай культуры працуюць тры кормаўборачныя камбайны, за штурваламі якіх знаходзяцца старанныя механізатары Віталь Феліў, Міхаіл Мажэйка і Віталь Стурліс. На падвозцы задзейнічаны 12-14 адзінак грузавой тэхнікі.

У гаспадарцы ўжо ўбрана значная частка кукурузы. Да канца гэтага месяца тут плануюць скончыць уборачныя работы. І, як адзначыла Вольга Лук’яненка, сёлета гаспадарка будзе з кармамі. Для іх закладкі ёсць сіласныя траншэі. На запаўненне кожнай з іх вызначаны два дні. У адваротным выпадку пагаршаецца якасць корму.

Трэба адзначыць, што ў “Агра-Солах” сіласныя траншэі пабудавалі значна раней указання кіраўніка краіны аб тым, каб у кожнай гаспадарцы былі належныя ўмовы для захоўвання кансерваваных кармоў.

Юрый ЯНУШКЕВІЧ.

Фота аўтара.

 

Поделиться:

Оставить комментарий
Текст сообщения*
Защита от автоматических сообщений