Рабіць дабро – гэта так прыемна…
“Напярэдадні Калядаў і Новага года мы вырашылі стаць своеасаблівымі Дзедамі Марозамі і стварыць хоць невялічкі цуд смаргонскім дзецям, - кажа прадстаўнік службы таксі “Калі ласка” Сяргей Марозаў. - Да дабрачыннай акцыі далучыліся ўсе сорак два вадзіцелі і наш дырэктар Актай Гашымаў. Мы сабралі грошы. Па просьбе дзетак з “Агеньчыка надзеі”, купілі ёлачку, упрыгожванні да яе, а таксама фрукты. Астатнія грошы перадалі старшыні аб’яднання Дануце Рак”.
Данута Рышардаўна зазначыла: “За сродкі з “канверта” мы арганізуем якую-небудзь экскурсію. Нашы дзеці вельмі любяць падарожнічаць”.
Паўдзельнічаць у дабрачынным свяце разам з таксістамі пажадалі аніматары – Снягурачка Ганна і “Фіксік” Таццяна. Разам з дзецьмі яны ўпрыгожылі ёлачку. Правялі для іх гульнёвую праграму. А потым з’явіўся Дзед Мароз, у вобразе якога прадстаў вадзіцель таксі Арцём Салавей. Са сваёй роляй ён справіўся бездакорна.
Пасля ранішніка, які прайшоў ў офісе аб’яднання, дзеці накіраваліся яшчэ на адзін – да Дзеда Мароза ў Арэхаўку. Яго ладзіў у Доме паляўнічага цэнтр творчасці дзяцей і моладзі. Удзельнікаў свята даставіла туды і прывезла назад усё тая ж служба таксі “Калі ласка”. Чараду прыгожых аўто ўзначальвала машына ДАІ.
Супрацоўнікі службы таксі і надалей паабяцалі падтрымліваць “Агеньчык надзеі”. Рабіць дабро – гэта так прыемна…
Галіна АНТОНАВА.
Фота аўтара.
