І будуць танцы на Крыўлянцы!
У яго межах праходзіў агульнарэспубліканскі конкурс ідэй для навучэнцаў ІХ-ХІ класаў у чатырох напрамках: тэхналогія, культура, інклюзія і экалогія. Удзельнікам конкурсу неабходна было распрацаваць ідэю ў адным з гэтых напрамкаў і прадставіць яго ў выглядзе публічнага выступлення ў фармаце навуковых канферэнцый TED.
Арганізатары конкурсу атрымалі больш за сотню ролікаў з арыгінальнымі ідэямі і цікавымі праектамі. Журы было складана вызначыць дзясятку фіналістаў.
Вучаніца нашай школы Кацярына Янголь прэзентавала праект “Танцы на Крыўлянцы”, галоўная ідэя якога – раскрыць і зберагчы прыроднае хараство малой радзімы, а таксама натхніць іншых на захаванне прыроды свайго краю.
“На першым этапе мы распавядаем мясцовым жыхарам пра важнасць клопату аб наваколлі, знаходзім аднадумцаў. Пасля ўсе разам выйдзем на ачыстку ракі Крыўлянкі ад смецця. А напрыканцы зладзім “Танцы на Крыўлянцы!”- паведаміла Кацярына.
Хутка дзяўчынка пазнаёміцца з ментарамі і пачне рыхтавацца да свайго выступлення на маштабнай канферэнцыі TEDxYouth@Minsk, правядзенне якой запланавана на май. Пасля выніковай прэзентацыі сваіх ідэй усе пераможцы атрымаюць у падарунак iPhoneXs.
Таццяна ВАРЫЦКАЯ, намеснік дырэктара Крэўскіх ясляў-сада – сярэдняй школы.
