Майстар, які спалучыў у сваёй творчасці графіку, фатаграфію, музыку і нават рэстаўрацыю. Яго работы – гэта своеасаблівыя вандроўкі ў часе, якія зачароўваюць і акрыляюць.
Вандроўкі ў часе: у смаргонскім музеі адкрылася выстава Мікалая Гіза «Легенды Крэўскага і Мірскага замкаў»
Общество
13.06.2025
У гісторыка-краязнаўчым музеі адбылося ўрачыстае адкрыццё выставы работ Мікалая Гіза пад назвай «Легенды Крэўскага і Мірскага замкаў». Удзельнікі імпрэзы мелі магчымасць перанесціся скрозь стагоддзі ў эпоху рыцараў і замкавых таямніц. І асабіста пазнаёміцца з майстрам.
«Нарадзіўся Мікалай Іванавіч у вёсцы Малюшычы Карэліцкага раёна. Маляваць пачаў у далёкім дзяцінстве, пазней захапіўся выпальваннем па дрэве, ужо ў школьным узросце ўдзельнічаў у раённых выставах дзіцячай творчасці, – адзначыла вядучая імпрэзы Таццяна Мацкевіч. – Пасля асвоіў спецыяльнасць сталяра-разьбяра ў сучасным Мірскім мастацкім прафесійна-тэхнічным каледжы, у якім працаваў майстрам на працягу 22 гадоў».
А потым стаў рэстаўратарам. Працаваў на знакавых аб’ектах, у тым ліку на аднаўленні сядзібы Міхала Клеафаса Агінскага ў Залессі, музея народнай архітэктуры і побыту ў Азярцы. З мая 2021 па красавік 2023 года шчыраваў на аднаўленні Крэўскага замка».
«У Крэве, калі з’яўляўся вольны час, я пачаў ствараць графічныя работы, у аснову якіх ляглі легенды пра замак. Для мяне гэта справа аказалася не ў навінку: серыю малюнкаў дагэтуль я ўжо стварыў пра Мірскі замак», – удакладніў Мікалай Іванавіч.
Вядучая імпрэзы дапоўніла аповед: «Малюе мастак у асноўным простымі графічнымі алоўкамі, лінерамі, гелевымі і шарыкавымі ручкамі. Часам у свае працы дадае колеру з дапамогай акварэльных фарбаў альбо каляровых алоўкаў. Таксама ў арсенале мастака маюцца так званыя джазавыя кампазіцыі малявання, дзе аўтар змешвае ўсё: і алоўкі з тушшу, і акварэль з лінерамі».
Дарэчы, галоўны герой выставы – прафесійны мастак з дыпломам інстытута культуры. Толькі ў разьбе па дрэве, а не ў графіцы. Абразы, паклонныя крыжы, сувеніры – кожная работа ўражвае творчым падыходом.
Падчас імпрэзы на слайдах можна было ўбачыць таксама металічныя дэкаратыўныя упрыгожванні, якімі аздоблены кветнікі ля пад’ездаў і лесвічныя пляцоўкі – прадстаўленыя работы таксама выканаў Мікалай Гіз.
Адчуваецца, што творчая жылка не дае спакойна жыць мастаку, ён пастаянна ў пошуку. А вынік яго работ можна назіраць, наведваючы выставы, якія, несумненна з’яўляюцца цудоўным падарункам для аматараў мастацтва.
Выстава ў музеі будзе працаваць да 6 ліпеня.
Галіна АНТОНАВА.
Фота аўтара.
