Да канца гэтага года ўступіць у сілу пастанаўленне Міністэрства аховы здароўя, згодна з якім будуць устаноўлены максімальныя цэны на ўсе віды стаматалагічных паслуг.
Ці стануць “па зубах” стаматалагічныя паслугі?
Общество
05.12.2023
Фото из интернета
Эксперты на працягу некаторага часу вывучалі рынак, аналізавалі тарыфы дзяржаўных і прыватных стаматалагічных клінік. Пасля гэтага падлічылі і вывелі максімальны кошт розных відаў лячэння, пратэзіравання і артадантычных паслуг.
Як гэта адаб’ецца на кашальках смаргонскіх пацыентаў, мы запыталі ў загадчыка стаматалагічнага аддзялення ЦРБ Мацвея Ляшука.
“Пасля таго, як выйшла гэтае пастанаўленне, мы правялі падрабязны аналіз тарыфаў, якія дзейнічаюць у нашым стаматалагічным аддзяленні, - расказаў Мацвей Стэфанавіч. – Прыйшлі да высновы, што тарыфы не зменяцца альбо зменяцца неадчувальна. Хутчэй гэта пастанаўленне рэгулюе цэнаўтварэнне ў прыватных клініках, дзе сустракаюцца завышаныя тарыфы”.
З цікаўнасці мы параўналі тарыфы ў дзяржаўнай і адной з платных стаматалагічных клінік Смаргоні. На сёння лячэнне зуба на платнай аснове ў стаматалагічным аддзяленні каштуе прыкладна 70 рублёў (залежыць ад глыбіні карыесу), да гэтай цаны можна дадаць пламбіраванне каналаў, калі яно патрабуецца. За адзін канал давядзецца вылажыць яшчэ 30 – 40 рублёў. Наша чытачка Ала не так даўно звярталася ў прыватную клініку. “Двухканальны” зуб ёй абышоўся каля 300 рублёў. Простая замена пломбаў ёй і сыну каштавала яшчэ па 130 рублёў.
Калі зуб усё ж уратаваць не ўдалося, будзе патрэбна пратэзаванне. У стаматалагічным аддзяленні адзін зуб з металакерамікі будзе каштаваць 200 – 220 рублёў.
Ала, якая з задавальненнем звярнулася б у дзяржаўную стаматалогію і вылечыла зубы там, адзначыла, што вялікай праблемай для яе стала чарга на лячэнне. А ёй паслугі ўрача патрэбны былі тэрмінова. “Сапраўды, у нас вялікая чарга на стаматалагічныя паслугі, - пагаджаецца Мацвей Ляшук. – Сёння не толькі ў нас, але і па ўсёй рэспубліцы назіраецца дэфіцыт кадраў. Толькі па Гродзеншчыне патрабуецца больш за 100 урачоў-стаматолагаў. І мы шукаем тэрапеўтаў, хірургаў, артапедаў. Калі штат будзе поўнасцю ўкамплектаваны, чэргі, безумоўна, зменшацца”.
Віялета ВОЙТКА.
Интересные и актуальные новости Сморгонского района в нашем Telegram-канале. Подписывайтесь по ссылке!