Аксіёма і тэарэма Надзеі Мікелсонс

“Мастацтва сапраўды мае цудадзейную сілу”, - а гэта ўжо вядомая жыццёвая тэарэма, якую Надзея бліскуча даказала.

Хвароба спасцігла маладую жанчыну нечакана. Пошук лепшых урачоў, працяглае лячэнне. Адна ўрач параіла Надзеі зусім незвычайны спосаб узнаўлення - прапанавала заняцца творчасцю. “Я нават вершы спрабавала пісаць… Але аднойчы ўзяла ў рукі пэндзлік і не выпускаю яго з рук дагэтуль. Прысвячаю маляванню ўвесь свой вольны час”, - расказвае маладая жанчына.

Хвароба ад Надзеі адступіла. Дакладней, галантна ўступіла месца творчасці і спорту. Гледзячы на мужа Надзя захапілася паўэрліфтынгам, а пасля ў Ашмянскім цэнтры творчасці дзяцей і моладзі пачала трэніраваць падлеткаў.

Надзея Мікелсонс з вялікай напругай называе сябе мастачкай. Хаця за тры гады стварыла больш за 400 работ у тэхніцы акрыл і акрыл-спрэй. 

Малюе не толькі на традыцыйным палатне, але і на шкле, камені, спіле дрэва. На яе карцінах - мала рэальных прадметаў і вобразаў. Надзея глядзіць глыбей: спрабуе адлюстраваць настрой, гук, пах... Каля работ хочацца спыніцца, глядзець і ўглядацца, каб разгадаць іх сэнс і таямніцу.

Пра тое, што Надзея такі пладавіты творца да нядаўняга часу ніхто, акрамя яе блізкіх, не ведаў. З “падполля” яе вывела ашмянская журналістка Аліна Санюк. Даведаўшыся пра захапленне маладой жанчыны, Аліна пераканала мастачку, што нельга хаваць сваю творчасць. Трэба дзяліцца ёй з публікай. І Надзея асмелілася. Ашмянскім гісторыка-краязнаўчы музей імя Францішка Багушэвіча зладзіў выставу яе работ, якая адразу перакачавала ў Смаргонь.

6 жніўня ў Смаргонскім гісторыка-краязнаўчым музеі адбылося адкрыццё выставы “Мой утульны дом”. Акрамя цікавых карцін, Надзея робіць яшчэ і арыгінальныя вазы (лепіць іх з гіпсу і размалёўвае), яны таксама прадстаўлены на выставе.

 “Прызнацца, я б раней не паверыла, каб мне сказалі, што Надзя будзе так маляваць, -  зазначыла мама Надзеі падчас адкрыцця выставы. - Тыя рэдкія карціны, якія яна малявала ў дзяцінстве, адрозніваліся неардынарнасцю, - Але я ніколі не бачыла, каб яна гэтым захаплялася. У іншым выпадку я б абавязкова запісала яе ў мастацкую студыю”. 

Надзея і сама прызналася: “Я ніколі не думала, што буду столькі маляваць. Тым больш ніколі не думала, што буду выстаўляць свае работы. У мяне няма спецыяльнай мастацкай адукацыі. Гэта мой занятак для душы, ніводнай карціны я  не прадала. А сёння з радасцю я прадстаўляю свае работы на суд гледача. Буду вельмі шчаслівая, калі каму-небудзь яны спадабаюцца”.

Выстава самадзейнай мастачкі Надзеі Мікелсонс будзе працаваць у Смаргонскім гісторыка-краязнаўчым музеі на працягу месяца.

Галіна АНТОНАВА.

Фота аўтара.