Першае паседжанне аматарскага аб’яднання “Майстры Смаргоншчыны” прайшло ў раённым Цэнтры культуры
Як адзначыла Таццяна Вікенцьеўна, у складзе аб’яднання ўжо 32 майстры, якія займаюцца рознымі відамі рамеснай і мастацкай дзейнасці. Лозапляценне, кераміка, апрацоўка скуры, дэкупаж, ткацтва, вышыўка, саломапляценне… Людзей, якія ствараюць шыкоўныя рэчы сваімі рукамі, у нашым раёне нямала.
Сустрэчы для ўдзельнікаў аб’яднання будуць ладзіцца раз у два месяцы, а пры неабходнасці – часцей. У вайберы створана группа, дзе аператыўна падаюцца навіны і іншая неабходная інфаомацыя, якая можа быць цікавай і карыснай для мясцовых творцаў.
Першае паседжанне членаў аб’яднання адбылося ў раённым Цэнтры культуры. Перад прысутнымі выступілі Вераніка Шчуроўская і Людміла Стручко.
Вераніка – упершыню, а Людміла – у трэці раз удзельнічалі ў Рэспубліканскім фестывалі-кірмашы майстроў Беларусі “Чароўны млын”, які тройчы на год праходзіць у Мінску і збірае лепшых творцаў з усіх рэгіёнаў рэспублікі і нават замежжа. На вясновы “Млын” заяўку падавалі дзве за паловай тысячы чалавек, для ўдзелу арганізатары запрасілі толькі пяцьсот. Узровень удзельнікаў вельмі высокі.
На мерапрыемства прыходзяць тыя, хто ведае каштоўнасць рэчаў, прапанаваных для пакупнікоў. Нашы майстры на кірмашы не згубіліся, і пажадалі сваім калегам не баяцца, не хвалявацца, а падаваць заяўкі і ўдзельнічаць у “Чароўным млыне”.
Захапляльна выступіла перад прысутнымі яшчэ адна майстрыха са Смаргоні Людміла Канаплёва. Пэўны час Людміла Мікалаеўна стварала прыгожыя рэчы са скуры, вяла гурток у РЦК, вучыла працаваць са скурай іншых людзей. А пасля зацікавілася лёнам, цяпер у яе творчай скарбонцы – цудоўныя льняныя сувеніры, якія карыстаюцца попытам у пакупнікоў.
На працягу апошніх пяці гадоў майстрыха захапілася стварэннем, а дакладней, узнаўленнем традыцыйных беларускіх народных строяў. На сустрэчы ў раённым Цэнтры культуры прадэманстравала палескі строй. Асобныя элементы яе касцюма – намітка (старажытны традыцыйны жаночы галаўны ўбор, які насілі замужнія жанчыны ў Беларусі), кашуля, бусы – рэчы арыгінальныя. Жаночую спадніцу замужняй жанчыны Людміла Мікалаеўна пашыла з тканіны, якой ужо больш за 100 гадоў.
Людміла Канаплёва родам з Расіі, у Беларусь прыехала трыццаць гадоў таму. Пачала вывучаць гісторыю і культуру Беларусі, і цяпер актыўна дзеліцца з намі сваімі ведамі і творчасцю.
Галіна АНТОНАВА.
Фота аўтара.
